मराठी कविता - देश प्रेमी - डाॅ. सुनिता चव्हाण,मुंबई.

मराठी कविता -  देश प्रेमी

देश प्रेमी
   

टिळक गांधी यांचेकडे होती सत्याग्रहाची किल्ली,

भ्रष्टाचाराच्या फांदीवर बसलेत आता शेखचिल्ली

कधी,कसे पडतील,याची नाही त्यांना हमी,

कुठे भेटतात का हो आता खरे देशप्रेमी?

नाक्या-नाक्यावर उभा लोकशाहीचा रक्षक,

तरीही दिवसा ढवळ्या स्त्री होते भक्षक,

न्याय मिळेल का तिला ?नसे कायद्याची हमी

कुठे भेटतात का हो आता खरे देशप्रेमी ?

नम्रतेचे शोषण,खरेपणा बनला गुलामगिरीचा हेका,

ताठ मानेची खोटी दुनिया,हा सद्यस्थितीचा ठेका

नपुंसकतेचे जीवन कसे येणार कामी,

कुठे भेटतात का हो आता खरे देशप्रेमी ?

स्वार्थी,दिखाव्याची लालसा होत नाही दूर,

स्वातंत्र्य,प्रजासत्ताकदिनी येतो देशभक्तीला पूर

तिरंगा लावण्याची छातीवर,त्यांना येते खुमखुमी

कुठे भेटतात का हो आता खरे देशप्रेमी ?

पर्वत रांगांमध्ये लढतो आहे देशासाठी जवान,

सुजलाम सुफलाम,राबतो आहे शेतात किसान,

डाॅ. सुनिता चव्हाण

करुन स्वदेशीचा स्वीकार..परकीयांची करू नाकामी

जाणीव ठेवून आपणच  होऊ खरे देशप्रेमी !

हिंसकतेचे ते किडेमकोडे,आहेत आपलेच गारदी,

ठेचावया त्यांना यावेत आता,सत्तेत अनेक पारधी          

टिपून सावजांना द्यावी देशाला सलामी              

आणि दाखवून द्यावे आम्ही आहोत खरे देश प्रेमी !!!

डाॅ. सुनिता चव्हाण,मुंबई.

-- माध्यमांवर भेटूया --